မြန်မာနိုင်ငံတွင် သစ်တောသယံဇာတများ ပျက်စီးပြုန်းတီးလာသည်နှင့်အမျှ သစ်တောစိုက်ခင်းတည်ထောင်ခြင်း လုပ်ငန်းအပြင် ပုဂ္ဂလိက အခန်းကဏ္ဍမြှင့်တင်နိုင်ရေးအတွက် ပုဂ္ဂလိက သစ်တောစိုက်ခင်းတည်ထောင်ခြင်းကို ၂၀၀၆ ခုနှစ်မှစ၍ ခွင့်ပြုပေးခဲ့ပါသည်။
ထိုသို့ခွင့်ပြုပေးခဲ့ရာ ၂၀၂၀ ပြည့်နှစ်ကုန်အထိ ပုဂ္ဂလိက ကျွန်း၊ သစ်မာနှင့် စက်မှုကုန်ကြမ်း စိုက်ခင်းဧရိယာ ၁၄ သိန်း ဧကကျော် ခွင့်ပြုလုပ်ကိုင်ခွင့်ပေးခဲ့ပြီးဖြစ်ပါသည်။
ထိုသို့ နိုင်ငံတော်၏ သစ်တောဖုံးလွှမ်းမှုဧရိယာ တိုးတက်လာစေဖို့ တဖက်တလမ်းက ကူညီအားဖြည့်ပေးကြတဲ့ ပုဂ္ဂလိက သစ်တောစိုက်ခင်းလုပ်ငန်းရှင်များကို အထူးကျေးဇူးတင်ရှိပါသည်။
၂၀၂၁ ခုနှစ် ဖေဖော်ဝါရီလ ၁ ရက်နေ့တွင် နိုင်ငံတော်အာဏာကို အဓ္ဓမသိမ်းယူထားသော အာဏာရူးစစ်ကောင်စီသည် ပြည်သူတို့ထံမှရရှိတဲ့ နိုင်ငံတော်၏ အခွန်ဘဏ္ဍာရန်ပုံငွေများဖြင့် လူသတ်လက်နက်များဝယ်ယူ၍ ကလေးသူငယ်များပါမကျန် တိုင်းရင်းသား ပြည်သူညီအစ်ကို မောင်နှမများကို သတ်ဖြတ်နေသည်ကို သိရှိကြပြီးဖြစ်ပါသည်။
သို့ပါ၍ လေးစားအပ်ပါသော ပုဂ္ဂလိက သစ်တောစိုက်ခင်းလုပ်ငန်းရှင်များအနေဖြင့် စစ်ကောင်စီလက်ကိုင်တုတ် သစ်တောဦးစီးဌာန၏ ၂၁-၅-၂၀၂၁ ရက်နေ့တွင် ပြုလုပ်သော အစည်းအဝေးဆုံးဖြတ်ချက်ပါ မြေငှားရမ်းခများကို မပေးသွင်းခြင်းဖြင့် ပြည်သူတို့၏ အသက်အိုးအိမ်စည်းစိမ်ကို ကာကွယ်ရာရောက်မည့်အပြင် ပြည်သူ့ CDM တွင်လည်း ပူးပေါင်းပါဝင်ရာ ရောက်ပါသည်။
MONREC- NUG အနေဖြင့် ပြည်သူပိုင်ပစ္စည်းများကို အလွဲသုံးစားပြုလုပ်ကာ အကြမ်းဖက်စစ်ကောင်စီအတွက် ရန်ပုံငွေရှာဖွေနေမှုများကို လုံးဝ(လုံးဝ) လက်ခံမည်မဟုတ်ပါကြောင်းနှင့် တွန်းအားပေးဆောင်ရွက်နေတဲ့ ဌာနဆိုင်ရာအကြီးအကဲများ၊ ပါဝင်ပတ်သက်သော ဝန်ထမ်းများအား ပြည်သူပိုင်ပစ္စည်းဖျောက်ဖျက်မှု၊ ပြည်သူ့ဘဏ္ဍာ အလွဲသုံးစားလုပ်မှုများဖြင့် အမည်ပျက်စာရင်း ရေးသွင်းသွားမည်ဖြစ်ပြီး မိမိတို့၏ လုပ်ဆောင်ချက်များအပေါ် အပြည့်အဝ တာဝန်ယူ၊ တာဝန်ခံရမည်ဖြစ်ကြောင်း သတိပေးပါသည်။
ပုဂ္ဂကသစ်တောစိုက်ခင်းလုပ်ငန်းရှင်များကလည်း ပြည်သူတို့နှင့်အတူ ရပ်တည်သည့်အနေဖြင့် မြေငှားရမ်းခ အခွန်ငွေများ ပေးသွင်းခြင်း မပြုကြပါရန်၊ မြေငှားရမ်းခ မပေးသွင်းသဖြင့် မြေပြန်လည်သိမ်းယူခဲ့လျှင်လည်း ပြည်သူ့အစိုးရ တက်ရောက်ချိန်တွင် ပြန်လည်စိစစ်ပေးမည်ဖြစ်ပါကြောင်းနှင့် ဆက်လက်ဆောင်ရွက်ရမည့် ကိစ္စရပ်များကို အမျိုးသားညီညွတ်ရေးအစိုးရ၊ သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာန၏ ညွှန်ကြားချက်ဖြင့်သာ လုပ်ဆောင်သွားမည်ဖြစ်ကြောင်း အသိပေးပါသည်။
ပြည်သူ့ဆက်ဆံရေးနှင့်မီဒီယာအင်အားစု
သယံဇာတနှင့်သဘာဝပတ်ဝန်းကျင်ထိန်းသိမ်းရေးဝန်ကြီးဌာန
မြန်မာနိုင်ငံအမျိုးသားညီညွတ်ရေးအစိုးရ