အမိန့်ကြော်ငြာစာအမှတ်(၁/၂၀၂၃)

၁။ ကျောက်မျက်ရတနာတူးဖော်ထုတ်လုပ်ခြင်းလုပ်ငန်းအတွက် တူးဖော်ထုတ်လုပ်ခွင့် ရရှိသူ (သို့မဟုတ်) ကုမ္ပဏီ သို့မဟုတ် အဖွဲ့အစည်းသည် တူးဖော်ထုတ်လုပ်ခွင့်အား တဆင့် ငှားရမ်းခြင်း (သို့မဟုတ်) တစ်နည်းနည်းဖြင့် လွှဲပြောင်းလုပ်ကိုင်လိုပါက ဝန်ကြီးဌာနသို့ သတ်မှတ်ပြဋ္ဌာန်းချက်များ နှင့်အညီ လျှောက်ထားနိုင်သည်။

၂။ တူးဖော်ထုတ်လုပ်မည့်လုပ်ကွက်သည် ပျက်စီးမှုများရှိနေသည့် လုပ်ကွက်ဟောင်းများ ဖြစ်ပါက လုပ်ငန်းမစတင်မီ သီးခြားပြင်ဆင်ကာလကို လျှောက်ထားရယူခွင့်ရှိသည်။ 

၃။ ခွင့်ပြုမိန့်သက်တမ်း (၃) နှစ် ကုန်ဆုံးသည့်အခါ၊ ထပ်မံ၍ စုစုပေါင်း (၁၀) နှစ်ပြည့်သည်အထိ တိုးမြှင့် လျှောက်ထားခွင့်ရှိသည်။

၄။ တူးဖော်ရရှိသည့် ကျောက်မျက်ရတနာအရိုင်းကို တွင်းဝခွန်ပေးဆောင်ပြီးပါက အောက်ပါ အခွင့်အရေးများကို ရရှိမည်ဖြစ်ပါသည် -

        (က) ပြည်တွင်း၌ လွတ်လပ်စွာသယ်ယူခွင့်၊

        ( ခ ) ပြည်တွင်း၌ ကျပ်ငွေဖြင့်ဖြစ်စေ၊ နိုင်ငံခြားငွေဖြင့်ဖြစ်စေ လွတ်လပ်စွာ ရောင်းချခွင့်၊

၅။ သတ်မှတ်နည်းလမ်းနှင့်အညီ တင်ပြ၍ ပြင်ဆင်ထုတ်လုပ်လိုက်သည့် ကျောက်မျက် ရတနာ အချောထည်၊ လက်ဝတ်ရတနာနှင့် ကျောက်မျက်ရတနာဖြင့် ပြုလုပ်သော ပစ္စည်းများနှင့် စပ်လျဉ်း၍ အောက်ပါအခွင့်အရေးများကို ရရှိမည် ဖြစ်ပါသည်-

        (က) ပြည်တွင်း၌ လွတ်လပ်စွာသယ်ယူခွင့်၊ 

        ( ခ ) ပြည်တွင်း၌ ကျပ်ငွေဖြင့်ဖြစ်စေ၊ နိုင်ငံခြားငွေဖြင့်ဖြစ်စေ လွတ်လပ်စွာ ရောင်းချခွင့်၊

        ( ဂ ) ပြည်ပသို့ လွတ်လပ်စွာ တင်ပို့ရောင်းချခွင့်၊

၆။ ခွင့်ပြုမိန့်ရရှိသူအနေဖြင့် ကျောက်မျက်ရတနာ တူးဖော်ထုတ်လုပ်ခြင်းအတွက် လိုအပ်သည့် လုပ်ငန်းဆိုင်ရာ ယာယီအဆောက်အအုံ၊ ပစ္စည်းသိုလှောင်ရုံနှင့် တဲတန်းလျားများ ဆောက်လုပ်ရေး အတွက်လည်းကောင်း၊ ထုတ်လုပ်ပြီး ကျောက်ရိုင်းများ၊ ဖြုန်းများနှင့် ယာဉ်စက်ယန္တရားများ ထားရှိရေးအတွက်လည်းကောင်း၊ မြေစာဆေးကြောရေး၊ ကျောက်ထု ခွဲရေးနှင့် မြေစာပစ်ရေးတို့ အတွက်လည်းကောင်း တူးဖော်ထုတ်လုပ်ခွင့်ရရှိသော လုပ်ကွက် ပြင်ပရှိ လုပ်ငန်းသုံးနေရာတစ်ခုခုကို သတ်မှတ်ထားသောကာလအတွင်း အသုံးပြုနိုင်ရန် အလို့ငှာ တင်ပြလျှောက်ထားရယူခွင့်ရှိသည်။

၇။ တူးဖော်ထုတ်လုပ်ခွင့်ရရှိသူအနေဖြင့် ထုတ်လုပ်မှုနှင့်ဆိုင်သော စက်ပစ္စည်းကိရိယာ များနှင့် လိုအပ်သောကုန်ကြမ်းပစ္စည်းများကို အကောက်ခွန်ကင်းလွတ်ခွင့် (သို့မဟုတ်) သက်သာခွင့်ဖြင့် တင်သွင်းရန်လျှောက်ထားနိုင်ခွင့်ရှိသည်။

၈။ တူးဖော်ထုတ်လုပ်ခွင့်၏ ၄၉ ရာခိုင်နှုန်းကိုရရှိထားသည့် ရင်းနှီးမြုပ်နှံသူ သို့မဟုတ် တူးဖော် ထုတ်လုပ်ခွင့်ရရှိသူအနေဖြင့် တူးဖော်မှုများနှင့်စပ်လျဉ်းသည့် ရှာဖွေမှုလုပ်ငန်းစဉ်များ၊ လိုအပ်သည့် ပစ္စည်းကိရိယာများ၊ လူအင်အား၊ စီမံခန့်ခွဲရေးနှင့် အခြားသောလုပ်ငန်း အကောင် အထည်ဖော်မှု လုပ်ငန်းစဉ်များအတွက် ၁၀၀ ရာခိုင်နှုန်း စိုက်ထုတ်ရင်းနှီး မြုပ်နှံရန် တာဝန်ရှိ ပါသည်။

၉။ ရင်းနှီးမြုပ်နှံမှုကာလတလျှောက်လုံး ထုတ်လုပ်မှု ကုန်ကျစရိတ်၊ စက်ယန္တရားဆိုင်ရာ တန်ဖိုးလျော့ကျမှု စသည်များနှင့် စပ်လျဉ်း၍ ထုတ်လုပ်ခွင့်ရရှိသူ၏ ထပ်မံ ရင်းနှီးမြုပ်နှံရမှု အပေါ် အကျိုးအမြတ်၏ ရာခိုင်နှုန်းတရပ် အရသော်လည်းကောင်း၊ အချိန်ကာလအလိုက် လည်းကောင်း ညှိနှိုင်းစဉ်းစားအတည်ပြုသွားမည်ဖြစ်သည်။